Вӹдсӹнзӓйӓл

Вӹдсӹнзӓйӓл (рушла деревня Ключёво) — Усола гӹц 2 уштышышты вӓрлӓнӓ. Сола сага техень нырвлӓ дӓ каремвлӓ улы: Ӱлвел лык карем, Васкан карем, Лидӹвуй карем, Ошкы карем, Саран кырык, Кыва ныр пач. Сола лӹм «вӹдсӹнзӓ» (родник) дӓ «йӓл» (сола) шамаквлӓ гӹц лин.

Истори

Пӹтӓришӹ гӓнӓ сола гишӓн 1795-шӹ ин сирен кодымы ылын. Сола халык первишен мӱлӓндӹ пӓшӓм ӹштен, вольыкым урден, корзинӹм плетен, каваштым ӹштен. 1921-шӹ ин солашты лыдмы пӧрт ылын. Коллективизаци жепӹн Вӹдсӹнзӓйӓлӹштӹ «Правда» лӹмӓн колхозым ӹштӹмӹ. Тӹдӹн пӹтӓришӹ вуйлатышыжы Валентин Иванович Кириллов ылын. Ти сола гӹц Кого Вырсышты 64 эдем кредӓлӹн, кымлы иктӹнжӹ коленӹт, кымлы кымытынжы токышты пӧртӹлӹнӹт. Нӹнӹ логӹц лейтенант Ион Алексеевич Анисимов, рядовойвлӓ Николай Николаевич Ильин, Клавдия Гавриловна Малышева дӓ молат. 1948-шӹ ин солашты радио попаш тӹнгӓлӹн, 1952-шы и гӹц телефон ровотая, 1959-шӹ ин тыл йылаш тӹнгӓлӹн, 1962-шы ин пӹтӓришӹ телевизор лӓктӹн.

Ӹлӹзӹ шот

1795-шӹ и — 27 кудывичӹ;
1859-шӹ и — 23 кудывичӹ (41 пӱэргӹ, 54 ӹдӹрӓмӓш);
1889-шӹ и — 25 кудывичӹ (72 пӱэргӹ, 80 ӹдӹрӓмӓш);
1897-шӹ и — 32 кудывичӹ (95 пӱэргӹ, 90 ӹдӹрӓмӓш);
1915-шӹ и — 42 кудывичӹ, 237 эдем;
1919-шӹ и — 41 кудывичӹ (105 пӱэргӹ, 121 ӹдӹрӓмӓш);
1925-шӹ и — 244 эдем;
1929-шӹ и — 50 кудывичӹ, 263 эдем (139 пӱэргӹ, 124 ӹдӹрӓмӓш);
2001-шӹ и — 61 кудывичӹ, 193 эдем (110 пӱэргӹ, 83 ӹдӹрӓмӓш).