|
'''Ондрин Валька''' (лачокла лӹмжӹ ''Валентин Андреевич Афанасьев'', [[27 февраль]] [[1954-шӹ]] и, [[Йынгы-Кушыргы|Йынгы-Кушыргы]]). — [[1971-шӹ]] ин [[Йоласал школ|Йоласал школым]] пӹтäрӹмӹкӹжӹ [[Ленинград|Ленинградыш]] кен, тӹштӹ техникеш тыменьӹн. Кӱшӹл пäлӹмäшӹн дипломым [[Волгоград|Волгоградыштыш]] юридический институтышты нäлӹн. [[Йошкар Ола|Йошкар Олашты]] ӹлä.
Сирäш 1970-шы ивлäн тӹнгäлӹн, лыдышвлä дон кӹтӹк прозым сирä. Пäшäвлäжӹм [[«Йӓмдӹ ли»]], [[«Жерӓ»]], [[«Кугарня»]],[[«Марий Эл»]], [[«Молодежный курьер»]] газетвлäштӹ дä [[«У сем»]], [[«Пачемыш»]] дä [[«Ончыко»]] журналвлäштӹ пецäтлӹмӹ. Сек яжо лыдыш книгäжӹ [[Шамак]] маналтеш (1996). Масакан [[«Икӓнӓ Опанас…»]] книгäжäт лыдшывлä лошты интересӹм понгыжтарен. Ондрин Валькан лыдышвлäжӹм комилä, рушла дä финнлä сäрӹмӹ.
<poem>
'''Ӹнянем, ӹнянем…'''|
Ӹнянем, ӹнянем,
Йӹрӓлтӓ мӹлӓнем
Иргодымшы кечӹ эче.
Керек мардеж ӱрлӓ,
Керек нӧртӓт юрвлӓ –
ӹняныде ӹлӓш кыце?
Ӹнянем айолан,
Ӹнянем яжолан,-
Толшашым талашем пыток.
Ӹнянем аярлан,
Ире кечӹяллан,
Вет лиэш тӹ вырт соиток.
Ӹнянем мӹнь йӓнглӓн,
Ӹнянем мӹнь тӓнглӓн –
Ӹлӹжеш пӹслӓнӹшӹ тыл.
Когоньнам со ужеш,
Шке сирӹшкӹ ӱжеш
Коэвлӓм шӓпкӓлӹшӹ Йыл!
'''Ӹштӹ шамак кӹлвлӓм шке тӹнь'''
Тӹнь шамаклан ит ли кукыр,
Пӓлен нӓл шамакым шукым…
Шамак – цилӓлӓннӓ палшык,-
Тонг гӹц олмаву кушшашлык.
Лижӹ шамак яжо, пуры,-
Кужы анзылнына курым.
Вуйын – вуйстык, сӱкӓн, мытык –
Ышмараж гӹц ит лӓк, иток.
Ширӹ-качы ит шач кӧргеш –
Пӧрӹктӓлтӹн лӓктӓт шергеш.
Шокшы, щӱтлӓлт кешӹ йӹлмӹ
Пӧртен канден кердеш кӹлмӹм.
Самынь лявӹрӓэш ямшым
Мышкын лыктын ӹштӹ яжом.
Йӹлгӹжӓлтшӹ, яклакавлӓм
Ит керд тырхен каклякавлӓм!
Ӹштӹ шамак кӹлвлӓм шке тӹнь –
Ит лӱд, ат ли вара шкетын.
Шке чонгештӹ, шке виктӓрӹ,
Ти пӓшӓлӓн вим ситӓрӹ!
'''Пӓлӹшӹ'''
Ик покашты, ик солашты
Ик ӹрвезӹ школыш каштеш.
Шайыштмашем ма гишӓн?
Ылеш рвезӹ кайышан.
Тӓнгвлӓ лошты цилӓ хӓлӓ
Утыдоно тӹдӹ пӓлӓ:
Ышмам веле пачын шу –
Лӓктеш тӹдӹн шамак у!
Тумаялат эче веле –
Попен шуа тидӹ пелӹм.
Вот маханьы пӓлӹшӹ
Когонокыш кӓрӹшӹ!
Манат, колышт доко тидӹм –
Севӓл шуа рвезӹ кидӹм
Ма техеньы вӓл, ӓнят
Пыра лош, хоть кӱ гӹнят.
Урок лошты веле ак кай
Дӓ тамалын шӹнзӓ апай.
Уке юкшы кӓрӹшӹн
Кышты ылат, пӓлӹшӹ?
'''Идӓ тӹкӓл'''
Машанедӓ, нерем –
Тӹкӓлӹдӓ нерем?
Шыпшеден шӹргӹвлӓм,
Мыльгыгтем тӹрвӹвлӓм.
Виш шуэн ышмаэм,
Тӹнгӓлӓм шаяэм,
Дӓ кидем шӓлӓтен
Шамаквлӓм шӓлӓтем.
Ыраж гӹцӹн йогат,
Пӹлӹшвлӓдӓ погат!
Маханьывлӓ вара,
Тӓлӓндӓжӹ яра!
Попашемжӹ ӓрняш
Дӓ шӱдедӓш цӓрнӓш
(Тӧтӧтлет тӹхӓлӓ
Пӱ лоэт тӹгӓнӓ) –
Кыцелӓ йӓ ӓрӓт
Кыце шӹдештӓрӓт!
Кашартем шаяэм,
Пашкартем ышмаэм
Дӓ пакыла нерем –
Идӓ тӹкӓл нерем.
[[Category:Мары персоналивлä|О]]
[[Category:сирӹзӹвлä|О]]
[[Category:Wp/mrj]]
|
